Skip to main content
Back to In The News
News

Shugabannin masana'antu sun yaba wa Dangote kan zuba jari a harkar noma

By Muhammad Aminu Ahmad, Aminiya
Shugabannin masana'antu a bikin baje kolin noma na ƙasa na 2026

Shugabannin masana'antu da masu ruwa da tsaki a fannin noma a Najeriya sun yaba wa Kamfanin Dangote bisa irin jarin da yake zubawa a harkar noma, inda suka ce hakan zai taimaka wajen bunƙasa samar da abinci da masana'antu a Afirka.

Sun bayyana hakan ne yayin bikin baje kolin noma na ƙasa na shekarar 2026, wanda Gidauniyar Noma ta Ƙasa ta Najeriya (NAFN) ta shirya. Taken baje kolin na bana shi ne "Gina Tsarin Abinci da Noma Mai Dorewa a Najeriya", kuma ya haɗa manoma, masu zuba jari, masu tsara manufofi da masu samar da fasaha.

Jami'ar kula da harkokin noma ta NAFN, Hajiya Aishatu Rufa'i Ibrahim, ta ce haɗin gwiwar gidauniyar da Kamfanin Dangote na taimakawa wajen ƙarfafa shigar kamfanoni masu zaman kansu cikin harkokin noma. Ta yaba wa Dangote kan gudunmawar da yake bayarwa ga tattalin arziƙin Najeriya, kuma ta buƙaci sauran masu zuba jari su yi koyi da shi ta hanyar ɗaukar noma a matsayin babbar dama ta kasuwanci.

Shugaban ƙungiyar manoma ta ƙasa, Alhaji Muhammad Magaji Gettado, ya ce zuba jarin manyan kamfanoni kamar Dangote na da muhimmanci wajen kawo sauyi a harkar noma. Ya ce shirye-shiryen gwamnatin Shugaba Bola Tinubu a fannin noma sun fara haifar da sakamako, amma ana buƙatar haɗin gwiwa tsakanin gwamnati, manyan kamfanoni da ƙananan manoma domin ƙara wadatar abinci.

Kwamishinan Aikin Gona na Jihar Nasarawa, Mohammed Iyimoga Oyigye, wanda ya wakilci Gwamna Abdullahi Sule, shi ma ya yaba kan bunƙasa noma da samar da abinci.

A saƙon da ta aike, Daraktar Kamfanin Dangote kuma babbar mai bai wa shugaban kamfanin shawara, Hajiya Fatima Wali-Abdurrahman, ta ce noma na daga cikin muhimman ginshiƙan bunƙasa masana'antu a Najeriya. Babban Manajan Hulɗa da Gwamnati na kamfanin, Malam Hashem Ahmed, ne ya wakilce ta. Ta ce kamfanin na faɗaɗa shirinsa na samarwa da sarrafa shinkafa a Arewacin Najeriya, kuma zai ci gaba da aiki tare da gwamnati da sauran masu ruwa da tsaki domin samar da abinci da ƙara darajar Najeriya a matsayin cibiyar noma da masana'antu a Afirka.

Rahoton Muhammad Aminu Ahmad, Aminiya, 18 ga Nuwamba, 2026.

Read the full story on Aminiya